
##Mustaqilligimizning 35 yilligi
Maktabgacha ta’lim — mustaqillik yillarida erishilgan natijalar va ustuvor maqsadlar
Mustaqillik yillarida mamlakatimizda maktabgacha ta’lim tizimini rivojlantirishga alohida e’tibor qaratildi. Bolalarni ta’lim bilan qamrab olish, ular uchun zamonaviy va qulay sharoitlar yaratish, ta’lim-tarbiya sifatini oshirish maqsadida keng ko‘lamli islohotlar amalga oshirildi.
2017-yilda 27,7 foizni tashkil etgan maktabgacha ta’lim qamrovi bugungi kunda 75 foizdan oshdi. Maktabgacha ta’lim tashkilotlari soni 30 mingdan ziyodga yetdi. Yangi bog‘chalar barpo etilib, mavjud muassasalar ta’mirlandi hamda zamonaviy jihozlar va o‘quv-metodik vositalar bilan ta’minlandi. Davlat va nodavlat maktabgacha ta’lim tashkilotlari faoliyatining kengayishi bolalarni ta’limga jalb etish imkoniyatlarini yanada oshirdi.
Ta’lim jarayonida bolalarning jismoniy, aqliy va ma’naviy rivojlanishiga ustuvor ahamiyat berilmoqda. Zamonaviy pedagogik texnologiyalardan foydalanish, bolalarning qiziqish va qobiliyatlarini erta aniqlash, shuningdek, ularni maktab ta’limiga puxta tayyorlash muhim vazifalar sifatida belgilanmoqda.
Ustuvor maqsadlar: ta’lim qamrovini yanada kengaytirish, ta’lim-tarbiya sifatini oshirish, zamonaviy va xavfsiz sharoitlar yaratish, malakali pedagoglarni tayyorlash, ularning kasbiy mahoratini muntazam rivojlantirish hamda har bir bola uchun teng imkoniyatlarni ta’minlashdan iborat.
Kelgusida maktabgacha ta’lim tizimini izchil rivojlantirish, barcha hududlarda sifatli ta’lim xizmatlarini yo‘lga qo‘yish va bolalarning har tomonlama kamol topishi uchun zarur shart-sharoitlarni yaratish dolzarb vazifa bo‘lib qoladi.
35 yillik mustaqillik — taraqqiyot, yangilanish va yorqin kelajak sari dadil qadam!
Abdurahmanova Nodiraxon Xusnutdinovna — Toshkent davlat tibbiyot universiteti Ijtimoiy fanlar kafedrasi katta o‘qituvchisi,
f.f.d (PhD).