Musobaqada universitetning 12 ta fakultetidan bittadan terma jamoa ishtirok etib, o‘zaro murosasiz va qizg‘in bahslarda bellashdilar. Uchrashuvlar davomida jamoalar o‘zlarining kuch-qudrati, texnik mahorati hamda jismoniy tayyorgarligini yuqori saviyada namoyon etdilar.
Musobaqa yakuniy natijalariga ko‘ra:
1-son davolash fakultetining “Liders” jamoasi faxrli 3-o‘rinni,
Xalqaro fakultetning “International” jamoasi 2-o‘rinni,
Pediatriya, stomatologiya, xalq tabobati va tibbiy pedagogika fakultetlarining “Gamlet” jamoasi esa 1-o‘rinni qo‘lga kiritdi.
Tadbir davomida O‘zbekiston Respublikasi Voleybol federatsiyasining Toshkent shahar bo‘limi raisi o‘rinbosari Abdujabbarov Umidjon Luhmanjanovich so‘zga chiqib, musobaqa ishtirokchilari hamda g‘olib jamoalarni samimiy tabrikladi. Shuningdek, u so‘nggi yillarda mamlakatimizda sport, ayniqsa voleybol yo‘nalishida olib borilayotgan islohotlar yangi bosqichga ko‘tarilganini alohida ta’kidladi. Jumladan, O‘zbekiston Respublikasi Prezidentining 2024-yil 19-iyuldagi “Voleybol sport turlarini yanada rivojlantirish chora-tadbirlari to‘g‘risida”gi 274-sonli qarori bugungi kunda voleybol sportiga qaratilayotgan yuksak e’tiborning yaqqol namunasi ekanini qayd etdi.
Shuningdek, taqdirlash marosimida Toshkent davlat tibbiyot universiteti yoshlar masalalari va ma’naviy-ma’rifiy ishlar bo‘yicha birinchi prorektori T.A. Bobomuratov so‘zga chiqib, 1-, 2- va 3-o‘rinlarni qo‘lga kiritgan jamoalarni tabrikladi hamda ularga medal, kubok va qimmatbaho esdalik sovg‘alarini tantanali ravishda topshirdi.
Musobaqa g‘olibi — “Gamlet” jamoasiga “Universitet kubogi” tantanali tarzda topshirildi. Ushbu musobaqa universitetda sog‘lom turmush tarzini targ‘ib etish, talabalar o‘rtasida sportga bo‘lgan qiziqishni yanada oshirishga xizmat qildi.
Mas’ullar: FAYZIYEV Z.B, NURIMOVA F.Z.







